تقييمات

مراجعة The Assignment

النسخة اللي بنينا عليها المراجعة : PS4

الحلقة اللي تكلمنا فيها عن الإضافة : بتنزل في 15 مارس 2015

The Evil Within وحدة من الألعاب الرهيبة اللي نزلت في عام 2014 واللي قدمت تجربة رعب كلاسيكية من المطور شينجي ميكامي اللي طور بعض أجزاء السلسلة الشهيرة Resident Evil . اللعبة أخذت لعبة العام بالنسبة لموقعنا في العام الماضي. قصة اللعبة كانت مثيرة للإهتمام بالنسبة لي شخصيا وهذه وحدة من أهم الأسباب اللي خلتني أشتري أول إضافة للقصة واللي هي The Assignment بالإضافة إلى أتموسفير اللعبة الرهيب والتنوع الكبير جدا في اللعبة فهل الإضافة كملت نفس المستوى أو للأسوأ ؟

التركيز على القصة 

يمكن من أكثر النقاط سيئة في اللعبة الكاملة إنها مافصلت وماتكلمت كثير عن القصة لكن هذا عكس اللي صاير في الإضافة . واضح جدا التركيز على إنهم يفهموك بعض الأشياء اللي كانت غائبة في اللعبة الكاملة منها تفاصيل مهمة جدا ومنها تفاصيل عادية لكن عموما تضيف إلى فهم القصة أكثر . وراح تلاحظ هذا الشي من خلال الأشرطة اللي تاخذها والمنتشرة في المراحل أو من خلال المقاطع السينمائية المدموجة مع الجيمبلاي . القصة تاخذك من أطراف مختلفة بحيث تحاول تشرح أهم الأشياء اللي كانت في اللعبة كاملة بشكل مباشر بعيد عن الغموض اللي كان في اللعبة الكاملة . 

تذكر CLOCK TOWER ؟

الإضافة إبتعدت كل البعد عن الأكشن اللي كان موجود في اللعبة الكاملة حرفيا مافي أكشن البتة . إذا تذكر اللعبة الشهيرة القديمة Clock Tower انه الطريقة الوحيدة للنجاة هي الهرب وهذا بالضبط اللي صاير في The Assignment السلاح ماتشوفه إلا في منطقة سريعة جدا لثلاث دقائق تقريبا وبعدها تودعه للأبد. الإضافة معتمدة بشكل كبير على عنصر التخفي بشكل كامل وبشكل 100 % واستخدام الأدوات مثل الفأس بشكل أيضا محدود جدا في بعض الأماكن فقط . يعني بإختصار الهرب هو سلاحك الوحيد في الإضافة . 

زعيم جديد , بس ليش كذا! 

الإضافة قدمت أعداء ووحوش وزعيم جديد كليا في اللعبة وحتى طريقة قتالهم وتجاوزهم مختلفة تماما عن اللي عرفتهم وأغلب الطرق كما ذكرت سابقا هي بالتكتيك والتخفي وفي بعض الوحوش جايين من اللعبة الكاملة يعني ماهم جديدين . المشكلة في الموضوع إنه الزعيم الجديد ماعنده تلك الرهابة اللي كانت مع راعي الخزنة اذا طلع تبدأ تخاف وتحسبله ألف حساب لحد ماتتجاوزه وتعدي المنطقة . الزعيم الجديد ببساطة تقدر تتجاوزه ولا يشكل تلك الخطورة بسبب آلية التجاوز البسيطة اللي ماوصلت ولا لذرة مع راعي الخزنة اللي كان في اللعبة الكاملة اللي في بعض المناطق بشق الأنفس تتخطاه . 

مجرد خدش بسيط من اللعبة 

الإضافة محتواها قليل جدا وأكثر عنصر متأثر هو الجيمبلاي , يعني ممكن أقولك إنه أغلب الوقت إنته مجرد تركض وتتخفى وراء شي وتركض وتتخفى وتركض وتتخفى وهلم جرا . مافيها ذيك الكمية المرعبة في التنوع اللي كانت في اللعبة الكاملة وببساطة الأفخاخ اللي تذكرها الكثيرة والكثيرة جدا , للأسف هي نادرة جدا في الإضافة وأقدر أقولك يمكن فخ أو فخين فقط في الإضافة كلها . وبشكل عام لما تلعب تحس إنه هذا مجرد خدش بسيط جدا جدا من اللعبة الكاملة وللأسف ماحملت معها مستوى اللعبة الكاملة أو ماتميزت بشي عن اللعبة الكاملة من ناحية كل شي باستثناء القصة كما ذكرت في البداية . وفي شي مهم جدا في اللعبة للفانز اللي جايين من الأيام القديمة وتم قطعه وإزالته في الإضافة وحتى الرعب اللي هو الأساس من كثر بساطة الإضافة صار سطحي جدا !!

الإضافة غير مهمة بتاتا الا للي مهتم في القصة واذا كنت جاي متحمس من اللعبة الكاملة وتريد شي يزيد من المتعة اللي كانت أو من المحتويات الكثيرة اللي كانت , فا الإضافة ماراح تقدملك اي من الاشياء الرهيبة اللي كانت وعلى العكس فيها نقص كثير جدا في الأشياء الممتازة اللي كانت في اللعبة الكاملة . الإضافة هي فقط للي يريد يعرف بعض تفاصيل القصة . عطيت الإضافة 6 / 10 ” خليها في بالك ” لسببين رئيسين أولا لأنها ماحافظت على نفس مستوى اللعبة الكاملة على الإطلاق وعلى الإطلاق للمرة الثانية للأسف الشديد ,  بالإضافة إلى إنه الزعيم عادي جدا في حضوره وفي قتاله وفي تجاوزه وكلها لحظات فقط لما يكون متواجد والزعيم هو الأساس اصلا في اللعبة الكاملة وفي الإضافة . 

خريج جامعة السلطان قابوس , يعمل حاليا مهندس نفط . بدأ الألعاب من يوم ماكان صغير . عرف هذا العالم بدايةً من جهاز الأتاري وعاد من يومها طاح في الألعاب .يقول إنه سلسلة ميتال جير سولد هي أرقى ما أنتجته صناعة الألعاب

No Comments Found

Leave a Reply