حلقات البودكاست

فتح باب الإنضمام للموقع

Oman

في مثل يقول إنك إذا تبغى توصل بسرعة فإذهب بمفردك لكن إذا تبغى توصل بعيد فإذهب بصحبة أشخاص آخرين. مرت أكثر من أربع سنوات ونصف على إفتتاحنا في الموقع وتغيرت أهدافنا وخططنا فيه خلال الفترة الماضية بتغير المتطلبات سواء من ناحية الجمهور أو حتى حياتنا الشخصية ووش هي الأشياء الي نقدر نقدمها في الموقع، المهم إننا نبغى ناس زيادة في الموقع بحيث إن محتوانا يتقدم بشكل أفضل للمتابعين في شتّى المنصّات.

حالياً نبغى شباب يشاركوا في البودكاست والموقع بشكل عام (رح نفتح المجال هالأسبوع للي يبغى يكتب مقالات عندنا)، أهم شرطين عندنا إنك مخلص ثانوية عامة بالإضافة لأنك تكون شخص مُلم بالألعاب القديمة والحديثة وتلعبها طبعاً وهذا شيء بديهي.

ملاحظة: ما نبغى شيء حالياً لليوتيوب لأننا جالسين نخطط لمستقبلنا فيه، متى ما إحتجنا له رح نعلن في موضوع منفصل أو في البودكاست.

وين أسلّم الـC.V؟

إجلس في غرفة هادئة وجيب أحسن مايك عندك وتكلم عن موضوعين، الأول هو تحليل لعبة معينة عالسريع (أحسن لعبة عندك أو لعبة تلعبها حالياً، ما يهم)، الموضوع الثاني هو إنك تخبرنا وجهة نظرك في وحدة من القضايا الموجودة في الصناعة حاليا (إنتشار الـDLC أو مستقبل Nintendo ولا تركيز الشركات على ألعاب الأونلاين… إلخ).. نبغى نشوف قدرتك على النقاش وغيرها، تكلم عن الموضوعين في ما لا يزيد عن خمس دقائق

بعد ما تنتهي أرسل لنا المقطع على الإيميل info@omanigamerz.com مع الأجهزة الي تمتلكها ورح نرد عليك خلال فترة إن شاء الله وبعدين بنتفاهم عاد خلف الكواليس. أعتذر مقدماً للطلبات الي تجينا من خارج السلطنة لأن الإنترنت مخلي موضوع إننا نستضيف أحد من خارج عمان شيء مستحيل تقريباً بدون ما يضيع وقت كبير جداً بسبب الإنقطاع والمشاكل المتواصلة في الإنترنت. وبس، متحمسين نشوف الجيمرز العمانيين الي مندسّين ولا نشوف لهم حس ولا خبر.

عُماني جيمرز هي العضوية المشتركة لأفراد فريق العمل ويستخدمونها لوضع المقالات والمواضيع التي تخص الموقع أو الفريق بشكل عام وغالبا ما تكون بمجهودات مشتركة، نقدر نقول تقريبا إن "الفرد للكل والكل للفرد".

No Comments Found

Leave a Reply